Grasofnæmi og blóðprufa

Við Atli fórum til læknis í dag og hann tók blóðprufu úr okkur báðum.
Ég er búin að komast að því með heima-tilraunarstarfsemi að Atli er með ofnæmi fyrir frjókornum (að öllum líkindum grasi) og þar sem það er gífurlegur verðmunur á ofnæmislyfjum eftir því hvort maður er með "resept" eða ekki vildum við fá það skjalfest.
Talandi um gífurlegan verðmun... börn með resept borga kr. 0,- fyrir ofnæmislyf og fullorðnir með resept borga 5% af því sem lyfin myndu annars kosta.

Svo er bara að vona að blóðprufan sanni á okkur ofnæmið.
Atli fór í prufu fyrir 2 árum og þá kom ekkert fram.
En allavega... ég lýsti tilraunastarfseminni minni og einkennum Atla fyrir lækninum og hann sagði að það væru ekki bara líkur á að Atli væri með ofnæmi, heldur væri ég búin að sanna það. Það þarf bara að vera skjalfest með blóðprufuniðurstöðu fyrir lyfja/lækna-eftirlitið.

Grill og slit...slit og grill

Síðasta vika fór í allskyns skólaslit; Skólaslit í Sörbö skóla, skólaslit með tónleikum í pianoskólanum og skólaslit hjá 7.bekk þar sem Sigrún fer í unglingaskóla á næsta ári. Það var þar sem Sigrún Erla sýndi töfrabrögð (sjá myndir).
Auk þessa var sumargrill hjá Taekwon-do, út að borða með vinnunni og auðvitað 17. júní grill hjá Íslendingafélaginu. Svo við höfum haft í nógu að snúast.
Milli grillveislna og skólaslita reyndum við svo að borða það sem til var í frystinum til að reyna að tæma hann. Í gær afþíddi ég svo frystinn og þreif hann og ísskápinn með klór.
Sigrún Erla fer svo til Íslands á morgun.

Okkur er öllum batnað kvefið og amma er farin aftur heim til Íslands. Við náðum að gera heilmargt skemmtilegt saman. Við fórum út að leika með myndavélarnar okkar. Fórum í göngutúra um hverfið, miðbæinn og í grasagarðinn. Við fórum í sólbað við Bråsteinvatnið og sátum í skugganum á efri veröndinni þegar það var of heitt í sólinni.

Íris er byrjuð í Brueland barnehage í fullu plássi. Hún er alsæl. Þar er mikið stærra útipláss en á Imi og fleiri krakkar. Mér finnst líka heilmikill munur að losna við stressið að vera búin að sækja hana fyrir kl 12:30

Ég fór í nýtt beltapróf og er komin með GULT belti í Taekwon-do (8.gup).
Voða stolt. Fékk engar neikvæðar athugasemdir. Gat svarað munnlegu spurningunum með sóma og gerði allar 12 armbeygjurnar á tánum! Gat gert 3 á hnjánum í janúar svo mér hefur farið fram!